|
Lukas Runggaldier miëur de Gherdëina
| |
|
| |
Lukas Runggaldier. |
Cun n 11ejim plazamënt tla cumbinazion Nordica pra I Juesc Olimpics à Lukas Runggaldier arjont l miëur plazamënt di atlec de Gherdëina. Na ntervista al atleta de S. Cristina, mut de Günther da L Ampezan y de Uliva da La Crëusc. N estluijiva na ntervista. Deplù n sada tla USC
USC: Cumplimënc per l boniscimo plazamënt pra la garejeda ndividuela dal gran saut HS134, ulache te ies ruvà 11ejim ala fin, do n setimo plazamënt sun l saut. Posses’a nes cunté de chësta esperienza, de ti mprescions?
Lukas Runggaldier: Scumencion pra l saut. Sun l gran saut ovi plucheauter problems a abiné l ritm, ma l di dant éi udù che pudove tenì pea sun l saut, canche é udù che la butova tl training, ulache é udù che pudove dì la mia.
La jiva de tenì l ritm, chël uel dì che n ne daussa nia vester massa bonorif y nia massa tardif.
L di dl saut nevòvel, ntan l saut. Perchël l ài nce desdit, do che fan sautei de n valguni; a dì la urità ne ovi iló nia fat n bon saut. Pona éi giapà na seconda chance. L tëmp fova miëur, ie fove cunzentrà drë’ a drët y dut cieche ove da fé sons stat bon de tré ora, fajan n bon saut propi tla garejeda, canche la messova vester, coche à dit l trainadëur Romed.
USC: A dì la urità ova i miëures cundizions mpue’ plu stletes che no tu y chëi che ie sautei dant.
Lukas Runggaldier: Mé doi ne à nia abù cundizions ideeles, scenó à duc abù la medema cundizions.
USC: Y pona la garejeda de pudejé, ulache te pioves via setimo, cun passa cincanta secunc do l prim.
Lukas Runggaldier: Messove cialé de abiné mi ritm i prims doi chilometri. Pona canche l fossa ruvà adalerch I boni ëssi messù cialé de tenì pea cun chisc boni, coche l finlandesc Manninen o Pittin y i autri boni de pudejé. Defati me ie mi tatica pona nce jita fata, de jì bën tl prim, tenian nce la resserva, chël uel dì jan mpue’ plu plan, y pona de jì pea cun chisc bestions.
Dal cuarto al 14ejim fans duc te na grupa, te chësta sons stat bon de tenì pea nchin a n chilometer dan la fin. Da dedò ne sons nia stat bon de jì pea nchin ala fin, ne ove nia la gran forma n chël di. D’autri iedesc fovi stat bon de jì deplù. Povester fovi nce mpue’ stanch da duta la sajon.
USC: Y la mprescion pra travert?
Lukas Runggaldier: Sun l mumënt fòvel mpue’ de delujion che ne son nia ruvà ti diesc, ma riesc do, cun ch’l bel tlima olimpich che te dà sudesfazion, l raport danter I atlec che ie for boniscimo, iel stat zeche de bel, na gran festa per duc nëus.
|