|
|
|
|
|
Iade tla Romania cun aiüć
Bele da valgügn agn incà va Cherubina Ploner da Pidrô ia tla Romania a ti portè aiüć a porsones che à debojëgn. Inće chësc ann éra stada tan inant; adöm cun Paul y Eduard Frenner, da La Val y Al Plan, y Luca Pedevilla da San Martin, àra indô fat na gran opera de bëgn
| |
|
| |
Siur degan Iaco Willeit dà la benedisciun. Bel a m... |
En cört süa testemonianza y valgünes stories che ai à podü vire. Ai 28 d’aurì sunse pià ia cun 2 auti: le pulmin dl Sorvisc ai Jogn y n ater pulmin cun indöt chi 2500 kg de guant, ćialzà, cutres, leć, patüc da scora y da mangé, panolins por mituns y por jënt atempada. Chësc patüc gnô desćiarié tla regiun Moldova tla Romania, la regiun plü püra dl paîsc. Sön chësc iade lunch ênse bun acompagnà dala benedisciun che siur degan Iaco Willeit ti à dè ai auti y a nos, le dé denant co pié ia, y dala benedisciun y oraziun de deplü proi y porsones dla valada che periâ por nos.
Do 3 dis de iade sunse rovà sura la cité de Suceava da n prou ortodos, olache i ùn desćiarié le pröm patüc y portè ite te val’ families patüc da mangé.
Na familia nes é jüda particolarmënter a cör; n jonn ê jü jö da rü a orëi se desfridé jö dal ćialt y é slizié, baton le će jö por na pera, y porchël él restè invalid, tan che al n’é gnanca bun da stè sentè; al ê ma ponü te so let. Süa só ê down. Te chësta familia sintîn dër na gran serenité y pêsc.
I ùn inće vijité n pice paîsc olache al ê n ”Kinderdorf” por mituns orfanns. Ai resta susc, deache i geniturs o la uma va plü dalunc a laurè, por ejëmpl tla Talia o te d’atri stać. Te chësc paîsc êl öna na ćiasa por pici mituns, öna por mituns che va a scora, öna por mituns che frecuentëia la scora mesana y öna por jogn ćina 18 agn.
Chësc paîsc vëgn sostignì economicamënter por na gran pert dal prou che nos ùn vijité, y ma por na picera pert dala regiun Moldova.
I ùn podü daidé na möta de 11 agn che à debojëgn de na operaziun al cör, zënza chësta operaziun àra püćes poscibilitês da suravire. L’operaziun costa 1.500,00€. Al prou ti falâl 1.000,00€ por paié l’operaziun y chisc unse nos dè ca.
Plü tert sunse jüs a Roman, na cité sciöche Bornech, olache al é les monies miscionares de Steyl. Tratan che i se palsân fora dal iade, sunse jüs a ciafè döes families che i conesciôn bele dai atri iadi, y i ti ùn portè guant, patüc da mangé, somënzes d’urt y val’ scioldo.
Le iade s’à portè inant a Raducaneni, olache sr. Maria Chiara Ellecosta se confortâ a nosta vijita. Chësc é n paîsc de za. 5.000 abitanć che vir da paur y che à plü la meseria co a Roman. Chësta meseria é gaujada dal gran consum de alcohol. Tröpes porsones de chësc paîsc spënn döt por le bëre; por mangé y se vistì mànćel i scioldi. Cun sr. Maria Chiara unse vijité na ćiasa de palsa, mo al n’é degun confrunt cun la ćiasa de palsa de nosta valada.
Chësc paîsc y la situaziun dla jënt nes é jüs dër a cör y restarà dî te nüsc pinsiers. I sperun de podëi ćiamò n iade passè te chisc posć y daidé n püch.
N bel y gran giulan orésson ti dì al Sorvisc ai Jogn, che nes à metü a desposiziun so pulmin, ala Cassa Raiffeisen, ala Cassa dl Sparagn, a Siur Degan, ai proi, a düć chi che à portè val’ guant o patüc da mangé y a chi che nes à dè ofertes.
Döt é rové a destinaziun y cun i auti öć sunse gnus zoruch. Bel giulan y che Chël Bel Dî ves recompensëies.
Cherubina Ploner
|
|