|
|
|
|
|
Dancà y da na pert
Uedli y oredles daverc sun la sozieté
Val’ domanda a Arianna Mazzel da Cianacei
tecnich de comun a Vich e gran pascionèda de sport
| |
|
| |
Val’ domanda a Arianna Mazzel da Cianacei
tecnich ... |
Can èste tacà a fèr sport?
Arianna Mazzel: “Fin da pìcola me à semper sapù bel jir en gita, a crepes o a fèr vies atrezèdes, ence soula, ma é tacà a fèr sport demò del 2007, dò aer vedù la Marcialonga del 2006. La Marcialonga per n muie de fascegn l’é la vértola per tachèr a fèr paslonch percheche l’é na endesfida che se fèsc con se enstesc e ence per me l’é stat coscì. Con chel obietif tedant é tacà a me alenèr e a jir coi schi da paslonch e chel istà son jita ence de corsa. Siere dalbon zompa al scomenz coi schi, no capìe nia de sciolina, ampò son stata bona de la fèr e me à sapù tant bel che ti egn dò é seghità e la é doventèda n apuntament stàbol, mìngol desche l Nadèl (grignon!). Dapò é vedù che no l’é demò la Marcialonga, ma duta na serie de garejèdes da fèr autertant beles. Per ejempie é fat la Dobbiaco-Cortina, son jita te la Svezia per ben cater outes....”
Chest per chel che vèrda l paslonch. Ma te fès ence n muie de auter, noe?
“Ei, aldò de la sajons e del calandèr de competizions, i prumes meisc de l’an fae apontin paslonch e ite per anter ence schi alpinism, dò tache con la roda ajache é l’obietif de la Marcialonga Cycling, a chela che ge tegne n muie, entorn a la metà o la fin de jugn scomenze a corer, con fadìa ajache l’é senester passèr da la roda a la corsa, é fat ence vèlch Maratona, desche chela de Unejia e l’an passà chela de New York, e me é metù a la proa ence te na garejèda de thriatlon de messèl del 2011 a Treviso, che la me à piajù dassen n muie. Con la corsa vae inant amò fin de november se l’é da enjignèr na maratona e dò scomenze endò coi alenamenc per l paslonch.”
Che vélel dir per te fèr sport?
“Gé é semper sentù l’atività fisica desche n besegn, percheche la fèsc stèr ben ma, estra chest, fèr sport l’é ence spartir zeche che pièsc con autra persones, con cheles che dò vegn metù a jir n raport de fradaa. E dapò l’é l descors de la fadìa che mena a aprijièr n obietif, l descors de la endesfida, de se seghitèr a se miorèr. L’é na endesfida con se enstesc, e se na dì proprio no la va, se se sforza, se vèrda de la fèr jir a na vèlch maniera e chest deida a miorèr. L sport l’é bel percheche l determinea proprio n stil de vita, de chel che amàncol te chest moment no podesse fèr condemanco.
Tu t’es stata demez trop da Fascia per motives de studie. Che funzion èl abù l sport te chela situazion?
“Canche ere a Firenze fajee na vita n muie desvaliva, sport per ejempie n fajee proprio pech, giusta magari na pìcola corsa ite per anter o vèlch outa te nodadoa. Canche son vegnuda de retorn del 2007 enveze é tacà a fèr sport, mudan deldut mie stil de vita e chest me à dat ence l met de me fèr ite da nef te n grop de amisc, donca l’à abù segur na funzion emportanta per me.”
Tel sport anter femenes él rivalità?
”N muie piec che anter i omegn! Per ejempie te la garejèdes de roda sozet de tirèr “a turno” e l’é na gran solidarietà: chest se verifica segur anter i omegn e anter omegn e femenes, ma anter femenes l’é n muie desvalif, canche se é en gara no se peissa a auter e no se ge vèrda tel mus a nesciugn! L’é da dir che l’é n muie manco femenes che omegn e che de spes les é compagnèdes magari dal morojo e donca les fèsc la gara per sie cont. Aboncont, fora da la competizions, l’aspet de la fradaa no l mencia nience anter la femenes e chest l’é n muie bel!” (cri.m)
|
|