|
|
|
|
|
I ladins a Viena
Cater enes de mostres, desmustrazions y manifestazions tla capitala austriaca
| |
|
| |
Ladins a Viena. Da man ciancia: Josef Colz, Giovan... |
Cultura - Śën iela tan inant. Do n valgun mënsc de lëures de urganisazion, à scumencià a Viena la manifestazion „Ladinien in Wien“, na lingia de manifestazions cultureles che dura cater enes, metuda a jì dal Istitut Ladin Micurà de Rü, deberieda cun la Scoles autes populeres „Volkshochschulen der Stadt Wien“ y l Minister per la cultura dl’Austria.Dantaldut iel da udëi la mostra ambulanta n con’ di ladins dl Istitut Ladin a Viena te n valguna sëntes dla „Volkshochschulen“, sun parëies da lubrì adum, ulache n possa udëi duta la realtà ladina, sibe dal pont de ududa dl raion cun si storia, la rujeneda y cultura, l’economia y l sport. Pra la mostra iel nce da udëi libri sun i ladins. Oradechël à la jënt la puscibltà de giapé nfurmazions d’uni sort da na persona. Y pona vëniel metù a jì n valguna sëires tematiches, cun de plu argumënc. N possa dì che chësta sarà na bela ucajion di ladins per se fé audì y udëi, bonamënter una dla majeres che ie unida a se l dé nchinamò. Chësc ajache pra chësta Scoles autes populeres de Viena, se tràtel de 17 cëses de furmazion per la jënt do l tëmp dla scola, ulache l lëura medrë 700 persones tl ciamp dla furmazion, metan a jì manifestazions de furmazion y cursc d’uni sort.N rata che plu milesc de persones arà tres chësta gran manifestazion la puscibltà de unì a l savëi velch sun la valedes ladines y de se cunfrunté persunalmënter cun chësta. Hans Rindler, Uli Moroder y Josef ColzLa inaugurazion ie stata ai 1. de merz, cun la prejënza dl presidënt dl Istitut Hugo Valentin, dla diretëura dl Cunsorz dla Scoles populeres Elisabeth Brugger y dla diretëura dla cësa tl Alsergrund Monika Reif, che à sotrissà la mpurtanza dla manifestazion y la gran legrëza de avëi i ladins te cësa. Valentin à nce rengrazià l Minister per chësta ucajion y per l aiut ti ani passei. Danter l gran publich unit adalerch fòvel nce l reprejentant dl Minister per la cultura dl’Austria Heinz Wolf y la respunsabla de duta la Scoles populeres Elisabeth Brugger, che ie de Südtirol. L fova nce da udëi opres d’ert di artisć ladins che viv a Viena: Hans Rindler, Uli Moroder y Josef Colz.Ai 3 de merz iel pona stat l „Café politich“, na descuscion publica sun l argumënt “Viver danter maiuranza y mendranza”. L à fat pea reprejentanc de mendranzes linguistiches tl’Austria, l ntendënt ladin Roland Verra, l presidënt dla Lia di Chemuns ladins Bruno Senoner, l artista ladin Hans Rindler y l diretëur dl Istitut Ladin Leander Moroder. Rujeneda tl Literaturhaus Ai 18 de merz tl „Literaturhaus“ iel la manifestazion: “Ladinien: Rujeneda y leteratura.“ L professëur universiter Roland Bauer prejenterà l Atlant Linguistich Dolomitich (ALD), Ruth Bernardi, Iaco Rigo y Daria Valentin lijerà dant vel’ si pez scrit per ladin, nce cun na traduzion per tudësch. Raion y jëntAi 25 de merz saràl pona tla VHS Wien West, Haus de Begegnung Mariahilf - Ladinia na sëira cun la tematica “Raion y jënt”, cun Leander Moroder che fajerà la ntroduzion ala tematica, Gerhard Vanzi dl Superski Dolomiti che rujenerà dl svilup turistich dla Ladinia, l artista ladin Peter Demetz che rujenerà dl artejanat artistich y Flavio Moroder dla Scola de alpinism Catores che cunterà dla Ladinia sciche raion da jì a crëp. I Acajo sunerà pec de mujiga.
|
|