|
|
|
|
|
Fin stagion, Rèba sarada per ferie
Gnánca n local dalviert nte paisc. N pulmann de todësć l à mossù se fermé nten piazal per lascé ju la jent a fe suoi debujens. Becker:”L é debujen de n calendario de le giouride”
Rèba - Son ndavò ai tánc. Fenida la stagion turistica sa na Rèba no s’é bogn de ciapé n bar o n restoránt dalviert. Dut saré. Na situazion che se tira nnavánt oramei da agn, d’aisciuda come d’auton. E a chësta nsomeia ence che se siebe drio, con rassegnazion, a se usé. Ma a nen scior che nte chisc dis rua da Ciaulonch e Pordou ju o dal Agordin su, ci paruda ie restelo del paisc ? Fossa da ie l damané a chi sciori de nen pullmann todësch che nchëstadì i à mossù se fermé drio l garage de le coriere de la Dolomitibus, via dai piazai de Chël Vësco, a fè suoi debujens fisiologizi, perciéche nte paisc no l eva n bar dalviert. Per ciapé l prum local ulache se po mangé e beibe velch se mossa rué a Renac, ulache l é l bar de la lateria e la pizeria. Ma chi elo che ie l disc ai sciori che rua da La Plié nsu, e che ava bele dezedù de se fermé sa na Rèba, che plu nnavánt l é dut saré? O compagn a chi che rua dai jous nju che i mossa fe ncora doi o trei chilometri per ciapé n local da ji daité? A La Plié nveze, che turisticamente no l à zerto l inom che à Rèba, se ciapa dalviert, cuaji dut l ann, trei bar con doi restoránc e na pizeria. L temp mat e freit de st’aisciuda, che nsomeia l voie ne fè “paié” dut l bel temp del inviern, l no dáida de segur l turismo de chisc meisc, fat de coriere e jent che scomencëssa a se la rodé co la moto. Ma chilò no n assa da se traté de cialé le previjion del temp per dezide se nte paisc che se disc “turistich”, conven o no tignì n minimo de servisc publizi dalvierc. Ma de programé, coordiné e concordé i locai che resta dalvierc a na moda da seguré almánco ncin de paruda turistica organizada e eficente. L problem l epa ben ncin de dute le localité turistiche. Ma proprio coscita l é difizile vedei. A Corvera trei o cate locai i é dalvierc. Davánt a la medema situazion denunziada puoch plu che davánt n ann e mez da chëst sfoi, l assessor al turismo e l prescident de l’Aft i ava dit, cuaji auna, che chësta l’eva una de le priorité da descore fora coi operadous turistizi. Elo plu ste fat vèlch ? “Son tres ste de l’idea che no spete a l’Aft ma al Comun, che l ence chël che de fora le licenze, mëte a ji na forma de coordinament” se giustificheia l prescident de l’associazion turistica Sebastian Becker. “De chëst onve descorëst co l assessor al turismo, ma po, l é ben vera, no l é ste plu fat nia. No de colpe a degugn, nte sti meisc on bu na mascia de problemi da comedé via. Ma de segur ence chëst l é da comedé. L é ben da capì che a fin stagion duc abe voia de paussé e se programé le ferie. Ma pense che chilò se trate, a la fin, demé de se descore e concordé n calendario de locai dalvierc. Ence per de n servisc a la jent del luoch, per nos che vivon chilò. De segur na tel situazion l’é n dann per la paruda del paisc. Oramei, coche se disc, la fritada l’é fata, ma podon e mosson comedé per st’auton. E su na tèla mossarà pié a mán l’Aft.” (ls)
|
|