|
|
|
|
|
“Mendránze n poejia”, al via la 5° edizion
La scomenciadiva, ideada da Teresa Pezzei, da sto ann l’é organizada n colaborazion col Istitut Cultural Ladin Cèsa de Jan
Cultura - L’Istitut Cultural Ladin Cèsa de Jan e l Comun da Fodom, co l intent de porté nnavánt l proget ideé dal nlouta assessor a la cultura Teresa Pezzi, i mët a jì la 5° edizion del concorso nazional de poejia “Mendránze n poejia”. L’intent de chësta scomenciadiva,” disc l prescident del Istitut, Nani Pellegrini, “l é chël de fè cugnësce, slargé fòra e valorizé le culture de mendránza e promuove na maiou colaborazion ntra de mendránze, le scòle che l é sui teritròri nterescèi e duc i apascionèi de poejia che fèsc pèrt de le mendránze tutelade da la lege 482/99. L concors l é slargé fòra ence ai romanc del Canton dei Grijons de la Svizera. Vigni partezipánt l podarà tò pèrt con al plu trei poejie. Prò vigni opera mossarà ester ence la traduzion taliana. Chi che mana plu de trei poejie l vignarà lascé fora dal concors. Vigni poejia mossarà pervegnì n doi copie scrite a machina o fotocopiade e se poscibile ence n format eletronich per e-mail o su nen suport informatich (CD). De le doi, una mossarà ester firmada e scrit dapevia de ci lengaz de mendrànza che la fèsc pèrt, inom, cognom, ndiriz, numer de telefon (eventual e-mail) del autor e dichiaré che se trata de n’opera de sua nvenzion e che no l’é stada mèi publicada. Se a tò pèrt l é un aldesot dei 18 agn la dichiarazion mossarà ester firmada dan genitor o da chi che fèsc sua funzion. Co nen scrit a pèrt duc i autori i é nvièi a mëte prò chèlche riga biografica. Le scole de vigni ordine e grado che tol pèrt al concors, le mossarà fè pervegnì ndiriz, numer de telefon e e-mail de la scola e ence ndiriz, numer de telefon e, se l é, ndiriz eletronich de na persona che ciafiarà d’isté via a mantegnì i contac coi scritori che la giuria dezidarà de premié. I scric mossarà rué per i 15 de jugn 2010 a: Istitut Cultural Ladin Cesa de Jan – Concorso per Lingue Minoritarie – “Mendránze n poejia” - Via Villagrande, 54 - 32020 Colle S. Lucia (BL) ndiriz e-mail: info@istitutoladino.org – segreteria@istitutoladino.org. Le poejie le vignarà giudicade da na giuria formada da cinch membri cherìs fora nánter poec e leterac che s’à fat cugnësce per suoi scric n talián o ntel lengaz de mendránza. Al prum classifiché jiarà l premio “Naghena da mont de òr”, (“Dianthus superbus” ) al secondo la “Naghena da mont de arjent” e al terzo La “Naghena da mont de brom. A la pruma scòla classificada jiarà nveze 500 euro, a la seconda 400 e a la terza 300. Per vigni opera meritëola vignarà assigné, al autor o ai autori se se trata de opera coletiva, n diplom de mèrit. La zerimonia de consegna dei premi la sarà a Rèba de Fodom nsabeda ai 4 de setember 2010. L Ent promotor del concors l se provarà che le poejie le vegne publicade ence n forma antologica o su publicazion leterarie. Informazion Per dute le informazion se po’ telefoné ai numer 0437 720609 o 0436 7193 o sui sciti www.istitutoladino.org e www.comune.livinallongo.bl.it (ls)
|
|