|
Śo par Jou
Scentade su tre rodes, danoo famea, ma de oga
| |
|
| |
Doi pilotes de ‘l traes, su una de ra voltades de ... |
Ce bel, a tornà, cemodo che ‘l ea ‘na ota. Da pize se sfiadazaa, a fracà su i pedai, de el triciclo, chera tre rodes, pizores, ignante de podé montà su chera pi grandes, de ra bici. Fosc ‘l é par chesto che el Slider King, chesto noo sport, i sà coscita bel, a tropa śente. Par i vede, e mangare par proà, se pó se ciatà su par Jou, sabeda 5 e domegna ai 6 de maśo. S’i aea vedude ‘l an pasà, i prime, e ades i à parecià ‘na gara, con pi de zento pilotes, che rua da diversa nazios de Europa, da Portogalo, Ungheria, Francia, Svizera e Austria, pede a chi taliane, se sà. Casco ben sarà, sun testa, e algo par se parà i comedoi, i śenoie, se aese da suzede de se rebaltà. E ‘pò śo fugade, duto chel che se pó, su chera voltades de Jou, da i 2.236 metre de el śuogo, ves Col de Santa Luzia, ves Selva de Cadore. Nuia susuro de motore, né petrolio, da infumentà r’aria. Par se ra gode, i é dute boi. Par śì de oga, par core, par venze, vó ese nafré de mestier, de soramanego, cemodo che se disc, a bete chesto Slider King de ‘l traes, su ra voltades, senza se rebaltà. El gnon se sà, ‘l é par inglese, che sona pi moderno. Ogni tanto se ciata fora ‘na tabela, con su scrito “slide”: là i pilotes i sà che i à da se bicià, da bete de ‘l traes chesta rodes, par se voltà meo, senza rascià masa. Propio da chesto “slide” vien el gnon de ‘l atrezo. Se scomenza de ‘l sabeda dapò disnà, co ra proes, co i pilotes che vorarà vede cemodo che ‘l é el stradon, cuanto erto, ra voltades e duto el resto. De ‘l domegna ra gara. I scomenza dares 9 da bonora e i và inaante par duto el di, fin dares 17, de ‘l dapò disnà; i core par meśa ora, ‘pò i torna fin su in son, ‘pò un’outra meśa ora e inaante coscita, par sete otes. Coscita ci che à acaro de vede algo de noo, mai vedù ignante, pó śì su in Jou, mangare co i pize. Ma a ra famea ‘l é da i recordà, che no i pase par ra testa de se bete a fei gares, mangare su ‘l stradon daante ciaśa, inze ‘l paes, co ‘l reśiro de machines, de corieres e de camion, che pasa dute i dis.
Chesta manifestazion r’à anche un cuore: i strutarà su sode, par dià doa asocazios, par se recordà de ci che stà mal, de i pize che no pó smatiśà con chi outre: ra asociazion Città della Speranza, che in Anpezo conoscion da anes, che ra studia ra maraties de i pize, su ‘l ospedal de Padova, e Art 4 Sort, un’outra asociazion, voruda da Beatrice Vio, canpionesa de scherma, che ra laora par fei fei sport anche a ra parsones che stenta.
|