|
Zento Criste, zento artistes
Ra devozion par r’arte, inze ra fantasia de un scultor anpezan
| |
|
| |
I Criste de i zento artistes, betude aduna da ‘l a... |
Par doa setemanes, da i 25 de marzo ai 9 de aprile, a Merate, pede Milan, inze ‘l bel palazo Prinetti, ‘la rtista anpezan Andrea Gaspari de Min ‘l à fato una mostra de zento Criste, fate de len, de fer, de outre materiai. I à lourade zento artistes, ruade da diversa partes d’Italia: ogni un ‘l à un valor, e ‘na storia, che restarà inze ‘l cuor. Chesta bela idea r’é stada de Andrea Gaspari e ‘l à abù tropa sodisfazion. A vede chesta mostra ‘l é śù śo anche Dino e Gabriella Gaspari, i so jenitore; là s’à prejentà tanta śente, a vardà chesta operes, Criste de ogni sorte, ben lourade, creade con amor da ‘sta braa parsones, che es bete fora i so laore, i fesc vede a ‘l mondo, con amor e sodisfazion.
Andrea el merita tante plause e conplimente. De spes el rua inze ‘l so paes, ca da nośoutre, in Anpezo, a fei calche laoro, a organiśà alcuanta manifestazios, a portà i so amighe scultore, che i fesc operes de len, o de gnee, d’inverno.
“Ra stèla ra no toma indalonśe da ra zoca” – se disc in Anpezo, canche el fiol el tol da ‘l pare. I Gaspari i é brae artejane, brae artistes, che i porta a conosce cuanto inśegno che ‘l é casù, intrà chesta bela crodes, e ón acaro de aé śente coscita braa, bona de creà, con poco, un gran valor.
Par chesta mostra de Criste, a Merate, Andrea ‘l à lourà co ra asociazion culturale “La semina” de ra diozesi de Milan.
Teśele Michielli Hirschstein
|