|
|
|
|
|
Bela Ladinia... de zenza semper più en su... chesta outa la é jita en ju!
L grop de pascioné de schi alpinism à festejà la fin de la sajon da d’invern con na bela raida sul Gran Sasso, ma no demò...
| |
|
| |
N bel retrat de grop de Bela Ladinia te na cornisc... |
En jebia ai 12 de oril, da doman ben bonora (ma nience massa) doi furgogn del SkiTeam i é ponté demez da Fascia ciareé de atlec bie engaissé a jir a se far de bele raide sul Gran Sasso. Dò ore e ore de viac, fermà demò se no se podea far condemanco, sion monté sun forenadoa e zacan sion rué a Campo Imperatore, olache aon logà ju nosce art e dò nience n’ora siane jà duc coi schi ciolé, vertesc per no se lasciar sciampar chela che l’é stat la giornada miora per chel che varda l temp. Se aon spartì te doi gropes, la squadra A (A de atlec) e la squadra B (B de bravi e ence beloc) e sion ponté demez: la squadra A con a ciaf Oswald la é jita dreta envers la ponta del Corno Grande (2912 m.) ajache se cognea far cont sul bon temp che se aea te chel moment. Dò n bon toch coi schi l’é doventà dut tant ert che i à cognù se i tor fora, se i meter sun prossach e jir su per n canalin giacià. La sodesfazion de esser sun ponta la é stata grana ence se no i à podù se vardar trop dintorn percheche i era te la moza, aboncont i se à dat n bel ciaval a vegnir ju de retorn. La squadra B enveze, compagnada dal braviscim Ingo, la se à fat la forcela fin a la Sela del Mont Aquila (2494 m.) e dò la é vegnuda ju de retorn te na moza che no se vedea nience olache se jia.
Da sera se aon troà duc ensema, briefing per la raida perveduda per la dì dò e duc a cena te na sala enjignada sù tant bel che someaa n restorant a cinch steile! Dò cena sion stac amò n pech a se la contar e dò sion jic a dormir bonora ajache la dì dò ne spetaa na giornada dalbon sfadiousa e volaane esser duc bie pussé. L vender la squadra A la é endò pontada demez con Oswald che l li à mazé ju: danef Corno Grande, dapò ju te n canalon de neif fresćia, su deretorn su na picola forcela e dopò endò na schiada da ensomech. Rué ju te na val i à fat mìngol de mezmesdì e dapò Pizzo Intermesoli (2635 m.), endò l’ùltim toch coi schi sun prossach, n’autra schiada da ensomech a vegnir en ju e su endò co le pel sot i schi per l’ùltima fadìa... Canche i é vegnui de retorn i era strassomeé, ampò coi eies lustres dal content per la maraveousa raida che i aea podù far. Per la squadra B enveze pontar demez per la raida del vender l’é stat na fadìa béleche più grana che chela che i à fat dò... anter strade serade, stenge, n viac de n’ora e mesa per ruar japede l Mont Camicia (2564 m.) da n’autra man... zacan i à podù se meter i schi su la schena (!) e scarpetar na mesora dant de poder se i tacar. E su e su e su, sun na neif bela giaciada, canche i é stac mìngol più n su che mez l’à tacà a gonfedar... Dotrei no i à volù molar i é amò jic fin sunsom, zachei enveze se à pissà de no meter mac en proa e l’é vegnù ju de retorn fin olache aane l furgon... E dò en prescia de retorn per ruar a tor l’ùltima forenadoa de le cinch, senó no podaane più su te alberch! Na sfadiada mostro, ma che bel!
La sabeda, vedù che l temp no l ne à didà trop, aon fat valisc e sion vegnui en su. Sion jic a vijitar l’Aquila e sion resté duc a veder coche dò doi egn chesta zità la é amò segnada dal teremot: ponc dutentorn, la maor part de le boteighe la é amò serada, n mont de scartabìe con scrit su “Vendesi attività” ... Cogn esser stat dalbon n gran colp per chesta pera jent!
Dò esser jic mìngol inant e endò sion monté te furgon e su envers Civitanova Marche olache ne spetaa na bona cena de pesc. Dò cena, chi sun soe ame, chi con mesi de trasport “alternativi”, sion se n jic duc a dormir... bonora... percheche la dì dò cognaane levar per vegnir de retorn a ciasa!
E se à serà sù coscita la raida de fin de sajon de Bela Ladinia... n grop de amisc che ge sà bel jir co le pel, star ensema e se goder... Na bela familia, olache duc i é benvegnui. Per chest ge sporjon n bel develpai a chi che à endrezà, a Oswald e a Ingo che i ne à menà, e ence, sessaben, a duc chi che à tout part... percheche i à fat a na vida che chesta raida la dovente tant ben... che no se la desmentiaron! (sm)
|
|