|
|
|
|
|
N “rai de sorëdl”
Le trio “Ganes” cun les protagonistes Marlene Schuen, Elisabeth Schuen y Maria Moling dà fora so pröm album musical artistich. Pröma ćerćia al UFO a Bornech
| |
|
| |
Les trëi ćiantarines y musizistes da La Val Maria ... |
Musiga - L’album ê gnü anunzié bele l’ann passè da pert de Marlene Schuen te deplü ocajiuns de conzerć dles trëi jones da La Val - da sores desco “DoloMitiches” de mà a Bornech - y tla cornisc dles döes staziuns de turnê de Hubert von Goisern te Südtirol. Śëgn é dan man l’inom dl grup, “Ganes”, y inće la plata digitala, la CD, sot le titul “Rai de sorëdl”, cun catordesc ćianties, feter dötes cun tesć ladins, dala musiga y dales parores dantadöt dles trëi componëntes instësses.I ùn podü baié cun Marlene Schuen sön chësc proiet nü, che gnarà presentè le pröm iade le dé mercui ai 17 de forà - en Capiun - dales 20.00 inant tl zënter dla cultura y jonëza UFO a Bronech. La Usc: Marlene Schuen, la CD incundada l’ann passè da os trëi jones ladines ćiantarines dl grup de Hubert von Goisern vëgn śëgn fora. Cô poste pa tö nes descrì la sodesfaziun y ligrëza?Marlene Schuen: “Iuhuuuuuuu!!! I sun dötes trëi dër contëntes y i n’aspetun l’ora da podëi ćiantè y sonè les ćianties nöies dal vi dan ala jënt. La CD é veramënter garatada bun y i sperun che ara i plejes inće ala jënt. Finalmenter do da n gröm de CDs che i ùn tut sö cun Hubert (von Goisern) y d’atri artisć podunse tignì tles mans nosta pröma CD cun les ćianties che nos ùn scrit.” Tan gran é pa stè le laur da compone musiga y tesć, scebëgn che os sëis profescionistes te chësc ćiamp?“Al é bëgn val’ che dà n gran laur, nia ma da scrì les ćianties y i tesć, mo inće da tó sö te stüde, da chirì fora la jënt che sona, da coordiné i terminns, da chirì n inom por nos... chël à inće durè n bel pez (ara rî). Ispiraziun por les ćianties ne se manćia nia, porchël éra jüda bindebò debota y te n colp unse albü deplü ćianties che i minân da mëte söla CD. I ultimi mëisc da setëmber incà unse dediché a tó sö les ćianties. Metü man ànse bele l’aisciüda passada.” Ćiodì pa l’inom “Ganes” por os trëi?“Ganes é un di pröms inoms che nes é tomà ite, spo sunse passades a aguanes y a döt val’ d’ater, y ala fin derevers a Ganes. Le rü dla Gana coliëia nostes ćiases, les ganes se acompagnëia tles liëndes y stories da na vita. Al é n inom che sona bun, y: chê sa pa... n pü’ de sanch da ganes rogor magari ćiamò te nostes avënes (ara rî).” Degun iodler y degöna musiga folk tiroleja sön la CD. Ćiodì pa nia?“Haha, deache de chëra n’ùnse por le momënt fat assà. A pert che ara vëgn impò inće dant te nostes ćianties, te de piceres porziuns, feter zënza che an s’inteness, mo ares é chilò. Al é da aldì inzai n pü’ de iodler, mo fat te nosta maniera, les trëi usc che ćianta gonot adöm... inće chesc é n elemënt tipich alpinn.” Ćiodì pa na CD con feter döt ma ćianties ladines? Y, odëise os che al é na vaiga o che al é plü co ater n esperimënt, ost y di produzënć?“Dì che i ne s’ùn nia fat pinsiers sce fà les ćianties por ladin o no, ne foss nia cis la lerité. Al é zënz’ater n pü’ n risch, deache le pop baia d’atri lingac ćina śëgn! Ladin é nosc lingaz, te chësc lingaz somiunse y ponsunse, inće sce i viun bele plü dî demez. Nostes emoziuns baia ladin. Chësc él ince stè la jënt che nes à daidé, cun chëra che i ùn laurè te stüde y tröc che à aldì les ćianties, che s’un à intenü, y chësc bele da mëteman, canche i ponsân da fà inće val’ por ingleje o te d’atri lingac. An po veramënter dì che dër tröc che ne savô magari denant gnanca ći che al é le ladin s’à inamorè de chësc lingaz melodius che passenëia tan bun da fà musiga. Al é tler che al él les staziuns dl radio che s’la pënsa sura dui iadi sce ai mët en ona val’ te n lingaz che püć y degügn ne capësc. Mo ći che é inće bele sozedü é che i aldiun intres plü gonot da nüsc compagns y dala jënt che conësc bele les ćianties deplü parores ladines fora de süa boćia. Chësc é val’ dër de bel.” Cô ćiararà pa fora le sfëi che acompagnarà la CD? Saral inće da ciafè na spligaziun o traduziun di tesć ti maius lingac?“Al se fej dër plajëi che le cover é gnü fat da Barbara Tavella y Claus Vittur: chësta é na bela colaboraziun danter artisć ladins. I ne oress nia dì massa danfora. Al é zënz’ater n cuertl dër interessant, che fajarà baié la jënt. I tesć é scrić por ladin y i pinsiers plü importanć unse translatè tl ingleje, todësch o talian. I ponsun da fà söla homepage les traduziuns plü monüdes. Mo magari él inće damì da lascè che la jënt aldes fora ći che ara ô y lasces laurè la fantasia.” La pröma impresciun é che dantadöt la musiga y les usc é de gran maestria. Ëise laurè deplü sön la musiga, é por os la musiga plü importanta co le test?“I orôn dantadöt scrì tl “ladin da vigni dé “, che trasmët nostes emoziuns cun plü autentizité, y adorè les parores che à n bun sonn morjel inće por la jënt che ne capësc nia le ladin.” Olà gnarà pa fora la CD, y can pa? Cal y cô é pa le pröm feedback che i ëis albü?“La CD gnarà fora de mà ti paisc todësc, tl’Austria, Svizera, y tla Talia sot ala ćiasa discografica SONY-lawine. Bele canche i ên ćiamò te stüde él gnü i responsabili de ‘Bayern 3’ - le radio pop dla Bavaria y dla Sony - a se ascutè sö la CD, y ai nes à dè dër n bun feedback. Denant ne savôi gnanca che i ćiantun te chësc lingaz nia-conesciü y nos ne s’aspetân nia che ai le toless sö tan bun.” Informaziuns söl grup y söla CDLa band é metüda adöm - danfora - dales trëi protagonistes “Ganes” Elisabeth Schuen. Marlene Schuen y Maria Moling, spo él ala bataria Alex Pohn (batarist de Hubert von Goisern), ai keyboards David Lackner (inće pro Hubert von Goisern), ala chitara bassa Gustavo Brinholi (dal Brasil) y ala chitara Kilian Reischl.Diesc ćianties söla CD “Rai de sorëdl” dles “Ganes” é gnüdes tutes sö a Minca/München cun le produzënt Gunnar Graewert (produzënt de Claudia Coreck, Anette Louisian, Patrick Nuo, ez.), cater ćianties é gnüdes registrades a Salzburg da Hubert von Goisern cun so injenier dl sonn Wolfgang Spannberger. Sön döes ćianties saral inće da aldì na sorpreja de Hubert von Goisern.Do le conzert de promoziun a Bornech sarà Ganes da aldì a Minca tl Bayerischer Hof ai 15 de merz y a Vìena tl Porgy and Bess d’aurì. La CD gnarà fora ofizialmënter ai 28 de mà, dedô saral söl program conzerć de presentaziun. (iaco rigo)
|
|