La Usc di Ladins
 
"Plata dla Union Generela di Ladins dla Dolomites"
Italia – Südtirol – Urtijëi, St. Ulrich, Ortisei
P.IVA IT-00518150214
18 de auril 2014
Edizion Nr. 16/2014
Contegnù
Archirida
Al vegn chirì:
 

chirì maioura archirida
 
Temesc

Rubrica

Dancà y da na pert


Rosanna March, mère, ensegnanta, corista e maestra del Cor de gejia de Vich.

Religiun

Sinoda


Intervista a Annamaria Fiung, öna dles sinodales pro la Sinoda Diozejana.

Ert

”Flà”


Enscì se tlama la mostra de Egon Moroder Rusina.

Cultura

Aisciuda Ladina


L’Aisciuda Ladina met dant sia parbuda!
vos seis chilò:    Home  >   Gherdeina
revers Gherdeina
 
Gherdëina olimpica per duc

 
Nstadì iel stat la prejentazion ufiziela dla 13ejima Olimpiada de sport amatoriel per duc te Gherdëina. Na gran festa dl sport per cin' dis alalongia
 
 
 
Nstadì iel stat la prejentazion ufiziela dl’Olimpiada dl sport te Gherdëina.
  Nstadì iel stat la prejentazion ufiziela dl’Olimpi... 
Olimpiada de sport - I respunsabli à dit che l ie dut njenià, per la manifestazion dai 25 ai 29 de juni te Gherdëina. La Federazion nternaziunela de sport populer à cris ora nosta valeda per la Olimpiada de sport per duc (“Volkssportolympiade dl IVV - Internationaler Volkssport Verband”), na manifestazion sportiva nia cumpetitiva y davierta a duc i pasciunei. L’urganisazion de chësta Olimpiada de sport per duc ti fova a Gherdëina bele unida data tl 2010, pra l cunvëni nternaziunel anuel dl’assoziazions cumëmbres dl IVV. Ntlëuta ova Gherdëina abù la sëuravënta sun l’autra candidatures per l 2013 de Norvegia, Austria y Cina. 


IVV: Ades otmile manifestazions uni ann


Atualmënter iel ntëur a 5.500 assoziazions cumëmbres dl IVV, danter chëstes vëniel urganisà uni ann passa 7.500 manifestazions. L mumënt plu mpurtant ie i juesc olimpics che vën a se l dé uni doi ani te n auter paesc. Dai 25 ai 29 de juni saràla pona tan inant y dut se raiderà te Gherdëina ntëur ala ueia de se ancunté y de pratiché sport deberieda. Diletanc da dlonch caprò fajerà pea ntan chisc dis pra plu disciplines: jì a pe, sauté, nudé y jì cun la roda. La particularità de chisc juesc olimpics ne n’ie nia la cumpetizion ma l pensier coletif, de ancunteda y de sté deberieda. La Olimpiada de sport populer te Gherdëina sarà na manifestazion de sport per duc. L se trata de jì a pe o cun la roda, sun percursc njeniei ca aposta y che passerà tres duta la valeda. L ie mesun pië via ulache n uel, sibe a pe coche nce cun la roda, da Sëlva, S. Cristina y Urtijëi demez. La lunghëza dl percurs pòssen se crì ora danter 5, 11, 18 y 25 km per chiche va a pe, y 17 y 24 km per la roda. Oradechël iel nce udù dant na proa de nudé sun la lunghëza de 300 metri tla nudadoia Mardolomit. Duc possa tlo fé pea, l ie mesun se scrì ite per duc i dis o nce mé per un n di sëul. L ne se trata nia de na cumpetizion, l ne unirà ënghe no tëut ju i tëmps, l vën tenì cont mé dla partezipazion ala disciplines desferëntes. Pra la manifestazion iel udù dant te Gherdëina n valgun mile partezipanc da oradecà, sambën ie tlo ënghe la jënt ativa de Gherdëina nvieda a fé pea. Ntan chisc cin’ dis de sport amatoriel uniràl te uni zënter dl luech metù su na gran televijion ulache duc puderà udëi, via per l di y da sëira, la registrazions che unirà fates ntan la manifestazion. Duc ie oradechël nviei a fé pea pra la sëires che vëija dant manifestazions de mujiga, cultura y tradizion ladina.

Val Gardena-Gröden Marathon Running Race: Tl cheder di juesc olimpics de sport per duc te Gherdëina iel udù dant, n juebia ai 27 de juni, na maratona y mesa maratona diletantistiga de sauté sun la destanzes tlassiches de 42,195 y 21,097 km. Chësc fossa l prim iede che l vën a s’l dé te Gherdëina na maratona de sauté, garejeda che unirà metuda a jì n cunlaurazion cun la lia ASV Gherdëina Runners.


“Sensiblisé per la natura”


“Pra la manifestazion iel nce udù dant de sensiblisé i partezipanc n con’ dl stravardé la natura,” dij Günther Pitscheider, diretëur de Val Gardena-Gröden Marketing y a cë dl cumité de urganisazion, “l unirà metù a jì n servisc de trasport publich per i partezipanc dla manifestazion sportiva ntan chisc dis, nsci che i posse se nuzé dla curieres per se spusté te valeda y l ne sarà nia debujën de tò ca i auti privac. Pra la iscrizion giapa uniun danter l auter nce na boza biologica per l’ega y pra i “energy points” sun l percurs saràl da giapé dut l maië nia fat ite, per schivé che l vënie smacà refudam ncantëur”. De plu nfurmazions n con’ dl program, di percursc y dla iscrizions uniràl mo publicà plu inant sun la plates de informazion dla USC. L ie sambën mesun se nfurmé nce tres internet sun la plata www.ivvsuedtirol.info; pra la Lies dl Turism de Gherdëina iel da giapé debant n cudejel cun duta la nfurmazions sun chësta ntraunida de sport y cumpania. Jëuni che fej pea l proiet JAWA dla Nëus Jëuni Gherdëina ie priei de l fé a l savëi cherdan su l numer 0471 777777; la jëunes y i jëuni possa judé pea pra vel’ pitl lëur ntëur al’urganisazion dla manifestazion.


Irene Delazzer