|
|
|
|
|
Nduneda di Alpini a Bulsan
Ncuei vënderdi ai 11 de mei iela tan inant: l scumëncia la gran manifestazion di Alpini, la ancunteda a Bulsan. La Grupa Alpini de Gherdëina ne lascia nia valëi la polemiches: “Mé na strumentalisazion de n valguni”
| |
|
| |
La Grupa Alpini Gherdëina n ucajion dla nduneda dl... |
Alpini - L tleca mé tò n valgun comunicac a cajo, di trueps che vën mandei di per di nce te nosta redazion dla USC. Polemiches ne màncel. Na pitla cërcia: “Nduneda di Alpini cun la bandiera de viera dla Talia. Na desmustrazion dla italianità, per ti mustré ai südtiroleri chiche cumanda. Na nszenazion politica. I Alpini, chëi che à mazà tl’Etiopia, chëi che à menà milesc de südtiroleri tla perjunia. Y y y.” Da pert dl Südtiroler Heimatbund ti vëniel metù a cuer al assessëur provinziel Florian Mussner, che ie ënghe tl cumité de urganisazion, de ne lascé nia pro che la bandieres di Chemuns de Südtirol vënie tachedes ora dlongia la “bandiera de viera taliana”. Nsciuma, uni di n iel n’autra, y da coche l semea pudëssa la festa a Bulsan vester un di majeri spavënc tla storia de Südtirol.
La minonga dla Grupa Alpini de Gherdëina
Uniun possa y dëssa avëi si minonga. Ma l fej nce bon a audì mpue’ n’autra ciampana. Nscila scrij la Grupa Alpini de Gherdëina, te n comunicat mandà ite da Igor Demetz: „L ie stat n valguna polemiches n con’ de chësta manifestazion a Bulsan. Mi pensier ie chël che l se trata mé de na strumentalisazion politica de n valguni, ma dantaldut n tizé da pert dla stampa, do mi ntënder per vënder plu zaites. Chël che ie é pudù udëi, dijon da dedite, ie che l ie tan n gran lëur a mëter a jì velch da de tel, cun duc i problems de logistica y de trafich, che, almanco da pert di Alpini, ne n’iel nia unì dat gran pëis a cërta pruvocazions.” Demetz scrij inant che: “Nëus coche grupa de Gherdëina pudon se cunscidré drët fertunei. Te chisc ultimi ani ons fat pea duta la ndunedes ncantëur per la Talia, y dlonch ulache son stai ans, nce ajache lauron truep cun l turism, vel’un che un o l auter cunesciova. Chësta persones nes à dat albierch y da maië y da bever, suvënz nce zënza se damandé nia. Śën iel unit l mumënt che nëus ti reton i plajëies. Nscila se ons dat da fé per giaté na luegia a Bulsan per pudëi fé su n aciampamënt cun l mesun de durmì y de dé ora da maië.”
L nvit a jì ala nduneda
Demetz fej pona l nvit de jì de persona a se rënder cont cieche na tel nduneda ie: “Chësc ie zeche che ulësse ti dì a duc, Alpini y nia, unide a Bulsan per ve rënder cont cieche na Adunata ie. Y pona unide a nes crì, l sarà da maië y da se bever n bon got. Nosta luegia a Bulsan ie te Viale Trento, plu avisa danter l puent Loreto y l puent Roma. Nëus meton bën ora na tofla sun streda acioche n nes abine plu saurì. Chiche uel se fermé nce a durmì dëssa se tò pea l sach da durmì cun zeche da mëter sotite; per mëter ju na tenda iel ënghe lerch. Danz che per i auti ne saràl deguna lerch. Da ncuei vënderdi ai 11 de mei nchin a n lunesc daduman ai 14 de mei, sarà nosc aciampamënt a despusizion.” L nvit dla Grupa Alpini de Gherdëina ne n’ie nia mé per si aciampamënt, ma sambën dantaldut per la gran defileda: “N dumënia dala 9 da duman inant iel la defileda de duc i Alpini, dla grupes dla Talia y chëles che vën da dut l mond. Dala set da sëira plu o manco, toca pona la grupes de nosc raion y sambën nce nosta grupa.Y tlo ulëssi ti damandé a duc i Alpini de Gherdëina de defilé deberieda cun nëus, per fé na gran cumpëida y na bela figura dan duta la jënt che ie sun streda a cialé pro. Mo n iede,” Adunata Alpini Bulsan” unide a nes crì, nëus se ncunferton sun vo.”
Coche dì, aldò dla Grupa Alpini Gherdëina, na ucajion de ancunteda, de sozialisazion, de festa, ulache la polemiches dassëssa resté dedora da porta.
David Lardschneider
|
|