|
Les elezions dl doman
I ampezans é cherdés a les urnes: en domenia ai 6 de mei y en lunesc ai 7 de mei vegniràl lité l ombolt y l consei de comun. Duel anter Franceschi y Ghezze
| |
|
| |
Veduda sun Cortina. |
Ampez - Andrea Franceschi o Stefano Ghezze? „Progetto per Cortina – Tradizioni e futuro“ o „Per la nostra Cortina“? Dodoman éla tant inant. En domenia ai 6 de mei se deura les urnes, i ampezans é clamés a mete su l ombolt y l consei de comun. Anter doi candidac, anter does listes civiches é i 5.065 eletours de Cortina d’Ampez cherdés a lité. Les sies sezions litales, metudes su tla scola mesana, te Via del Parco, restarà davertes da les 8 a les 22 dla domenia ai 6 y da les 7 a les 15 de lunesc ai 7 de mei. I candidac per l scagn de capocomun de Cortina é l ombolt atual Andrea Franceschi y l coordinadour provinzial dl PDL Stefano Ghezze. Ad’ai é coliedes does listes civiches, vignuna con 10 candidac al consei de comun: Adriano Verocai, Enrico Pompanin, Nicola Bellodis “Pippi”, Stefano Dandrea, Giovanna Martinolli, Marco Ghedina “Tomasc”, Marco De Villa, Herbert Huber, Luca Alfonsi y Loris Zanol é sun la lista “Progetto per Cortina – Tradizioni e futuro”. Gianpietro Ghedina “Crepo”, Alessandro Barozzi, Eric Maria Brizio, Rocco Dal Pont, Mauro Dandrea “De Osia”, Giorgio Da Rin, Marco Dimai “Lustro”, Stefano Ghedina “Basilio”, Stefano Polloni e Paola Valle “De chi de Moris” é i candidac de “Per la nostra Cortina”.
Informazions per i eletours
La lista che davagnarà les elezions podarà mete su 7 conseiers y l ombolt. L’autra, en minorité, arà endere la poscibelté de avei 3 conseiers te consei de comun, che sarà metù adum dal ombolt y da 10 conseiers. L eletour podarà dé sia ousc a la lista dl candidat ombolt zenza pronunzié preferenzes, ma al podarà ence dé dant na preferenza a un n candidat per l consei de comun. La lista che giatarà deplù oujes davagnarà les lites. Eventuales litazions dezisives – sce trames does les listes ess da giaté avisa l medem numer de oujes – sarà ai 20 y 21 de mei. La giaurida dles zedoles vegnirà fata atira dapò la scluta dles sezions litales, a pié via da les 15.00 de lunesc ai 7 de mei. Bonamenter sarà l resultat bele dé fora l lunesc da seira y l capocomun vegnirà proclamé dal president dla sezion litala n.1.
Andrea Franceschi, “Progetto per Cortina – Tradizioni e futuro”
Na cherta di valours, per che Cortina sie y restes l post ideal olà vive é preveduda da la lista de Franceschi te si program. L dert de abitazion, per evité che i ampezans messe jì a vive foradecà, é l prum pont sun l program dl capocomun atual, che vuel se impegné ence per cie che reverda la sostenibelté ecologica y ambientala, che dess deventé la filosofia dla aministrazion. L Pat (Piano di Assetto del territorio) é vegnù aprové, ma truep da fé él ciamò per cie che reverda la viabilité, crié posc da parché, ence sot tera ite, per evité l trafich te paisc. Gran sostegn i empermet Franceschi al turism, a Cortina Turismo, per na promozion de Cortina a livel ence internazional. Al sarà l bujegn de fé infrastrutures sportives nueves y de sostegnì, ence economicamenter, assoziazions sportives y culturales. Gran valorisazion se merita, aldò dl program, ence la cultura ladina: al vegn bele colaboré con l Istitut Cultural Ladin Cesa de Jan y al é vegnù daurì te comun n ofize linguistich. L referendum vegn vedù da Franceschi sciche na ocajion y na ressoursa che an mess porté inant, emplù él da damané la reintroduzion de n assessour provinzial a les mendranzes. N aiut i vuel spo dé Franceschi a la categoria di artejans, categoria che patesc plu de d’autri la crisa. Gran emportanza i dà l capocomun atual a l’istruzion y a les scomenciadives linguistiches, informatiches, culturales y sportives che dess vegnì portedes inant da les scoles. Sostegn nia demé ai scolés, empermet Franceschi, ma ence ai joegn, a les families y a la jent atempeda, tres n miorament di servisc soziai, sanitars, de prum aiut y di servisc d’ambulatore.
Stefano Ghezze, “Per la nostra Cortina”
Recuperé la coejion soziala y tré ite i zitadins tla vita aministrativa è l obietif prinzipal dl coordinadour provinzial dl PDL, Stefano Ghezze; sté deberieda y ester na scuadra dess ester l pont de forza dla comunité ampezana, scriv l grup sun l program. L dert a la ciasa é ence l prum pont sun l program de “Per la nostra Cortina”, dert che i garantesces n davegnì te Ampez dantaldut a la jent dl post. L svilup dl turism, te n marcé intern, ma ence a livel internazional, é spo l secondo pont sun l program: l turism é emportan per Cortina, ence per tré su la categoria di artejans, che patesc plu de d’autri la crisa economica. L sport vegn vedù da Ghezze sciche n valour emplù per la comunité, l candidat i empermet n gran sostegn a les assoziazions sportives, che é fondamentales per l svilup turistich. Cultura y tradizions pò spo ence vegnì vedudes sciche ocajions de promozion turistica. Per cie che reverda la istruzion, che é bele a n bon livel, ma che pò vegnì mioreda ciamò deplù tl vers dla creazion de figures profescionales adatedes al marcé turistich, stàl scrit sun l program. Laours publics sarà nezesciars, scriv spo ciamò Ghezze, laours che vegnirà fac tl respet dl ambient y dla agricoltura; ambient y agricoltura che vegnirà valorisés tres raporc plu soc anter aministrazion, Regoles y Fondazion Unesco. Emplù empermet ciamò l candidat l sostegn dla “zela dla sozieté”, la familia, ma ence dla jent atempeda, con l miorament di servisc soziai y sanitars. L pont sun l referendum, olà che l candidat empermet de volei porté inant la chestion, scluj ju l program eletoral de Ghezze. (katia pizzinini)
|